Jain Aagam Acharanga - Original

Original Aagam in Prakrit

54 Prakrit sutra added yet 🙏🏻

I will keep adding more sutra as and when time permits. 😊

How to hide the links?

I have added the link for each sutra for you to easily navigate to its respective page to quickly read the meaning, explanation, transliteration etc. of that particular sutra. Moreover, so as not to distract you while reading the Aagam, I have purposefully set a very light color for them.

But if you find even that distracting or if you want to simply copy a group of sutras without copying the links thereof, you can hide all the links by clicking on this button.

पढमं अज्झयणं - सत्थपरिण्णा

पढमो उद्देसओ

सिरि उसहदेवसामिस्स णमो । सिरि गोडी - जिराउला - सव्वोदय - पासणाहाणं णमो । णमोत्थुणं समणस्स भगवओ महइ महावीर वद्धमाणसामिस्स । सिरि गोयम - सोहम्माइ सव्व गणहराणं णमो । सिरि सुगुरु - देवाणं णमो ॥

पंचमगणहर-भयवं-सिरिसुहम्मसामिविरइयं पढमं अंगं आयारंगसुत्तं पढमो सुयक्खंधो

सुय मे आउसं ! तेणं भगवया एवमक्खायं - इहमेगेसिं णो सण्णा भवइ ।

तं जहा — पुरत्थिमाओ वा दिसाओ आगओ अहमंसि, दाहिणाओ वा दिसाओ आगओ अहमंसि, पच्चत्थिमाओ वा दिसाओ आगओ अहमंसि, उत्तराओ वा दिसाओ आगओ अहमंसि, उड्ढाओ वा दिसाओ आगओ अहमंसि, अहे दिसाओ वा आगओ अहमंसि, अण्णयरीओ दिसाओ वा अणुदिसाओ वा आगओ अहमंसि ।

एवमेगेसिं णो णायं भवइ ।

अस्थि मे आया उववाइए, णत्थि मे आया उववाइए, के अहं आसी, के वा इओ चुओ इह पेच्चा भविस्सामि ।

से जं पुण जाणेज्जा सहसम्मइयाए परवागरणेणं अण्णेसिं वा अतिए सोच्चा, तं जहा - पुरत्थिमाओ वा दिसाओ आगओ अहमंसि जाव अण्णयरीओ दिसाओ वा अणुदिसाओ वा आगओ अहमंसि ।

एवमेगेसिं जं णायं भवइ ।

अत्थि मे आया उववाइए, जो इमाओ दिसाओ वा अणुदिसाओ वा अणुसंचरइ, सव्वाओ दिसाओ सव्वाओ अणुदिसाओ जो आगओ अणुसंचरइ, सोऽहं ।

से आयावाई लोयावाई कम्मावाई किरियावाई ।

अकरिस्सं च हं, कारवेसुं च हं, करओ यावि समणुण्णे भविस्सामि ।

एयावंति सव्वावंति लोगंसि कम्मसमारंभा परिजाणियव्वा भवंति ।

अपरिण्णायकम्मे खलु अयं पुरिसे, जो इमाओ दिसाओ वा अणुदिसाओ वा अणुसंचरइ, सव्वाओ दिसाओ सव्वाओ अणुदिसाओ साहेइ, अणेगरूवाओ जोणीओ संधेइ, विरूवरूवे फासे पडिसंवेदेइ ।

तत्थ खलु भगवया परिण्णा पवेइया । इमस्स चेव जीवियस्स परिवंदण माणण पूयणाए, जाई मरण मोयणाए, दुक्खपडिघाय हेउं । एयावंति सव्वावंति लोगंसि कम्मसमारंभा परिजाणियव्वा भवंति ।

जस्सेते लोगंसि कम्मसमारंभा परिण्णाया भवंति, से हु मुणी परिण्णायकम्मे ।

त्ति बेमि ।

॥ सत्थपरिण्णाए पढमो उद्देसओ समत्तो ॥

बिइओ उद्देसो

अट्टे लोए परिजुण्णे दुस्संबोहे अविजाणए । अस्सिं लोए पव्वहिए तत्थ तत्थ पुढो पास आउरा परितावेंति ।

संति पाणा पुढो सिता । लज्जमाणा पुढो पास ।

‘अणगारा मो’ त्ति एगे पवयमाणा, जमिणं विरूवरूवेहिं सत्थेहिं पुढविकम्मसमारंभेणं पुढविसत्थं समारंभमाणे अण्णे वि अणेगरूवे पाणे विहिंसइ ।

तत्थ खलु भगवता परिण्णा पवेइया - इमस्स चेव जीवियस्स परिवंदण-माणण-पूयणाए जाई-मरण-मोयणाए दुक्खपडिघायहेउं; से सयमेव पुढविसत्थं समारंभइ, अण्णेहिं वा पुढविसत्थं समारंभावेइ, अण्णे वा पुढविसत्थं समारंभंते समणुजाणइ ।

तं से अहिताए, तं से अबोहीए।

से तं संबुज्झमाणे आयाणीयं समुट्ठाए । सोच्चा भगवओ अणगाराणं वा अंतिए इहमेगेसिं णायं भवइ - एस खलु गंथे, एस खलु मोहे, एस खलु मारे, एस खलु णरए ।

इच्चत्थं गढिए लोए, जमिणं विरूवरूवेहिं सत्थेहिं पुढविकम्मसमारंभेणं पुढविसत्थं समारंभमाणे अण्णे अणेगरूवे पाणे विहिंसइ ।

से बेमि —

अप्पेगे अंधमब्भे अप्पेगे अंधमच्छे ।

अप्पेगे पायमब्भे,अप्पेगे पायमच्छे ।

अप्पेगे गुप्फमब्भे, अप्पेगे गुप्फमच्छे ।

अप्पेगे जंघमब्भे, अप्पेगे जंघमच्छे ।

अप्पेगे जाणुमब्भे, अप्पेगे जाणुमच्छे ।

अप्पेगे ऊरूमब्भे, अप्पेगे ऊरूमच्छे ।

अप्पेगे कडिमब्भे, अप्पेगे कडिमच्छे ।

अप्पेगे णाभिमब्भे, अप्पेगे णाभिमच्छे ।

अप्पेगे उयरमब्भे, अप्पेगे उयरमच्छे ।

अप्पेगे पासमब्भे, अप्पेगे पासमच्छे ।

अप्पेगे पिट्ठिमब्भे, अप्पेगे पिट्ठिमच्छे ।

अप्पेगे उरमब्भे, अप्पेगे उरमच्छे ।

अप्पेगे हिययमब्भे, अप्पेगे हिययमच्छे ।

अप्पेगे थणमब्भे, अप्पेगे थणमच्छे ।

अप्पेगे खंधमब्भे, अप्पेगे खंधमच्छे ।

अप्पेगे बाहुमब्भे, अप्पेगे बाहुमच्छे ।

अप्पेगे हत्थमब्भे, अप्पेगे हत्थमच्छे ।

अप्पेगे अंगुलिमब्भे, अप्पेगे अंगुलिमच्छे ।

अप्पेगे णहमब्भे, अप्पेगे णहमच्छे ।

अप्पेगे गीवमब्भे, अप्पेगे गीवमच्छे ।

अप्पेगे हणुयमब्भे, अप्पेगे हणुयमच्छे ।

अप्पेगे होट्ठमब्भे, अप्पेगे होट्ठमच्छे ।

अप्पेगे दंतमब्भे, अप्पेगे दंतमच्छे ।

अप्पेगे जिब्भमब्भे, अप्पेगे जिब्भमच्छे ।

अप्पेगे तालुमब्भे, अप्पेगे तालुमच्छे ।

अप्पेगे गलमब्भे, अप्पेगे गलमच्छे ।

अप्पेगे गंडमब्भे, अप्पेगे गंडमच्छे ।

अप्पेगे कण्णमब्भे, अप्पेगे कण्णमच्छे ।

अप्पेगे णासमब्भे, अप्पेगे णासमच्छे ।

अप्पेगे अच्छिमब्भे, अप्पेगे अच्छिमच्छे ।

अप्पेगे भमुहमब्भे, अप्पेगे भमुहमच्छे ।

अप्पेगे णिडालमब्भे, अप्पेगे णिडालमच्छे ।

अप्पेगे सीसमब्भे, अप्पेगे सीसमच्छे ।

अप्पेगे संपमारए ।

अप्पेगे उद्दवए ।

एत्थ सत्थं समारंभमाणस्स इच्चेते आरंभा अपरिण्णाया भवंति । एत्थ सत्थं असमारंभमाणस्स इच्चेते आरंभा परिण्णाता भवंति ।

तं परिण्णाय मेहावी णेव सयं पुढविसत्थं समारंभेज्जा, णेवऽण्णेहिं पुढवि सत्थं समारंभावेज्जा, णेवऽण्णे पुढवि सत्थं समारंभंते समणुजाणेज्जा ।

जस्सेते पुढवि कम्मसमारंभा परिण्णाया भवंति, से हु मुणी परिण्णायकम्मे ।

त्ति बेमि ।

तइओ उद्देसो

से बेमि — से जहा वि अणगारे उज्जुकडे णियागपडिवण्णे अमायं कुव्वमाणे वियाहिए ।

जाय सद्धाए णिक्खंतो तमेव अणुपालिया विजहित्ता विसोत्तियं।

पणया वीरा महावीहिं ।

लोगं च आणाए अभिसमेच्चा अकुतोभयं ।

से बेमि — णेव सय॑ लोगं अब्भाइक्खेज्जा, णेव अत्ताणं अब्भाइक्खेज्जा । जे लोगं अब्भाइक्खई, से अत्ताणं अब्भाइक्खइ; जे अत्ताणं अब्भाइक्खइ, से लोगं अब्भाइक्खइ ।

लज्जमाणा पुढो पास ।

‘अणगारा मो’ त्ति एगे पवयमाणा, जमिणं विरूवरूवेहिं सत्थेहिं उदयकम्मसमारंभेणं उदयसत्थं समारंभमाणे अण्णे वि अणेगरूवे पाणे विहिंसइ ।

तत्थ खलु भगवया परिण्णा पवेइया (पवेदिता) — इमस्स चेव जीवियस्स परिवंदण-माणण-पूयणाए, जाई-मरण-मोयणाए दुक्खपडिघायहेतुं से सयमेव उदयसत्थं समारंभइ, अण्णेहिं वा उदयसत्थं समारंभावेइ, अण्णे वा उदयसत्थं समारंभंते समणुजाणइ ।

तं से अहियाए तं से अबोहीए ।

से त्तं संबुज्झमाणे आयाणीयं समुट्ठाए ।

सोच्चा खलु भगवओ, अणगाराणं वा अंतिए, इहमेगेसिं णायं भवइ — एस खलु गंथे, एस खलु मोहे, एस खलु मारे, एस खलु निरए ।

इच्चत्थं गढिए लोए । जमिणं विरूवरूवेहिं सत्थेहिं उदयकम्मसमारंभेणं उदयसत्थं समारंभमाणे अण्णे वि अणेगरूवे पाणे विहिंसइ ।

से बेमि — संति पाणा उदयणिस्सिया जीवा अणेगे । इहं च खलु भो अणगाराणं उदय जीवा वियाहिया । सत्थं चेत्थ अणुवीयि पास । पुढो सत्थं पवेइयं । अदुवा अदिण्णादाणं ।

कप्पइ णे, कप्पइ णे, पातुं, अदुवा विभूसाए ।
पुढो सत्थेहिं विउट्टंति । एत्थ वि तेसिं णो णिकरणाए ।

एत्थ सत्थं समारंभमाणस्स इच्चेते आरंभा अपरिण्णाया भवंति । एत्थ सत्थं असमारंरभमाणस्स इच्चेते आरंभा परिण्णाया भवंति ।

तं परिण्णाय मेहावी णेव सयं उदयसत्थं समारंभेज्जा, णेवण्णेहिं उदयसत्थं समारंभावेज्जा, उदयसत्थं समारंभंते वि अण्णे ण समणुजाणेज्जा ।

जस्सेते उदयसत्थसमारंभा परिण्णाया भवंति, से हु मुणी परिण्णातकम्मे ।

त्ति बेमि ।

चउत्थो उद्देसो

से बेमि — णेव सयं लोगं अब्भाइक्खेज्जा, णेव अत्ताणं अब्भाइक्खेज्जा ।

जे लोगं अब्भाइक्खइ, से अत्ताणं अब्भाइक्खइ । जे अत्ताणं अब्भाइक्खइ, से लोगं अब्भाइक्खइ ।

जे दीहलोगसत्थस्स खेयण्णे, से असत्थस्स खेयण्णे । जे असत्थस्स खेयण्णे, से दीहलोगसत्थस्स खेयण्णे ।

वीरेहिं एयं अभिभूय दिट्ठं, संजतेहिं, सया जएहिं, सया अप्पमत्तेहिं ।

जे पमत्ते गुणट्ठिते, से हु दंडे पवुच्चइ ।

तं परिण्णाय मेहावी इयाणिं णो जमहं पुव्वमकासी पमाएणं ।

लज्जमाणा पुढो पास ।

‘अणगारा मो’ त्ति एगे पवयमाणा, जमिणं विरूवरूवेहिं सत्थेहिं अगणिकम्मसमारंभेणं अगणिसत्थं समारंभमाणे अण्णे वि अणेगरूवे पाणे विहिंसइ ।

तत्थ खलु भगवता परिण्णा पवेइया — इमस्स चेव जीवियस्स, परिवंदण-माणण-पूयणाए, जाई-मरण-मोयणाए दुक्खपडिघायहेउं, से सयमेव अगणिसत्थं समारंभइ, अण्णेहिं वा अगणिसत्थं समारंभावेइ, अण्णे वा अगणिसत्थं समारंभमाणे समणुजाणइ ।

तं से अहिताए, तं से अबोधीए । से त्तं संबुज्झमाणे आयाणीयं समुट्ठाए ।

सोच्चा भगवओ अणगाराणं इहमेगेसिं णायं भवइ - एस खलु गंथे, एस खलु मोहे, एस खलु मारे, एस खलु निरए ।

इच्चत्थं गढिए लोए, जमिणं विरूवरूवेहिं सत्थेहिं अगणि कम्मसमारंभेणं अगणि सत्थं समारंभमाणे अण्णे वि अणेगरूवे पाणे विहिंसइ ।

से बेमि — संति पाणा पुढविणिस्सिया तणणिस्सिया पत्तणिस्सिया कट्ठणिस्सिया गोमयणिस्सिया कयवरणिस्सिया ।

संति संपातिमा पाणा आहच्च संपयंति य । अगणिं च खलु पुट्ठा एणे संघायमावज्जंति ।

जे तत्थ संघायमावज्जंति, ते तत्थ परियावज्जंति । जे तत्थ परियावज्जंति, ते तत्थ उद्दायंति ।

एत्थ सत्थं समारंभमाणस्स इच्चेते आरंभा अपरिण्णाया भवंति। एत्थ सत्थं असमारंभमाणस्स इच्चेते आरंभा परिण्णाया भवंति ।

तं परिण्णाय मेहावी णेव सयं अगणिसत्थं समारंभेज्जा, णेवऽण्णेहिं अगणिसत्थं समारंभावेज्जा, अगणिसत्थं समारंभंते वि अण्णे ण समणुजाणेज्जा ।

जस्सेते अगणिकम्मसमारंभा परिण्णाया भवंति, से हु मुणी परिण्णायकम्मे ।

त्ति बेमि ।

पंचमो उद्देसो

तं णो करिस्सामि समुट्ठाए मत्ता मइमं अभयं विदित्ता तं जे णो करए एसोवरए, एत्थोवरए, एस अणगारे त्ति पवुच्चइ ।

जे गुणे से आवट्टे, जे आवट्टे से गुणे ।

उड्ढं अहं तिरिंयं पाईणं पासमाणे रूवाईं पासइ, सुणमाणे सद्दाइं सुणेइ । उड्ढं अहं तिरियं पाईणं मुच्छमाणे रूवेसु मुच्छइ, सद्देसु यावि । एस लोगे वियाहिते ।

एत्थ अगुत्ते अणाणाए पुणो-पुणो गुणासाए वंकसमायारे पमत्ते अगारमावसे ।

लज्जमाणा पुढो पास ।

‘अणगारा मो’ त्ति एणे पवयमाणा, जमिणं विरूवरूवेहिं सत्थेहिं वणस्सइ कम्मसमारंभेणं वणस्सइ सत्थं समारंभमाणे अण्णे वि अणेगरूवे पाणे विहिंसइ ।

तत्थ खलु भगवया परिण्णा पवेइया - इमस्स चेव जीवियस्स परिवंदण-माणण-पूयणाए जाई-मरण-मोयणाए दुक्खपडिघायहेउं, से सयमेव वणस्सतिसत्थं समारंभइ, अण्णेहिं वा वणस्सतिसत्थं समारंभावेइ, अण्णे वा वणस्सइसत्थं समारंभमाणे समणुजाणइ ।

तं से अहियाए, तं से अबोहीए ।

से त्तं संबुज्झमाणे आयाणीयं समुट्ठाए । सोच्चा भगवओ अणगाराणं इहमेगेसिं णायं भवइ — एस खलु गंथे, एस खलु मोहे, एस खलु मारे, एस खलु णिरए ।

इच्चत्थं गढिए लोए, जमिणं विरूवरूवेहिं सत्थेहिं वणस्सइ कम्मसमारंभेणं वणस्सइ सत्थंसमारंभमाणे अण्णे वि अणेगरूवे पाणे विहिंसइ ।

से बेमि —

  1. इमंपि जाइधम्मयं, एयंपि जाइधम्मयं ।
  2. इमंपि वुड्ढिधम्मयं, एयंपि वुड्ढिधम्मयं ।
  3. इमंपि चित्तमंतयं, एयंपि चित्तमंतयं ।
  4. इमंपि छिण्ण मिलाइ, एयंपि छिण्ण मिलाइ ।
  5. इमंपि आहारगं, एयंपि आहारगं ।
  6. इमंपि अणिच्चयं, एयंपि अणिच्चयं ।
  7. इमंपि असासयं, एयंपि असासयं ।
  8. इमंपि चयावचइयं, एयंपि चयावचइयं ।
  9. इमंपि विप्परिणामधम्मयं, एयंपि विप्परिणामधम्मयं ।

एत्थ सत्थं समारंभमाणस्स इच्चेते आरंभा अपरिण्णाया भवंति । एत्थ सत्थं असमारंभमाणस्स इच्चेते आरंभा परिण्णाय भवंति ।

तं परिण्णाय मेहावी णेव सयं वणस्सइसत्थं समारंभेज्जा, णेवऽण्णेहिं वणस्सइसत्थं समारंभावेज्जा, वणस्सइसत्थं समारंभंते वि अण्णे ण समणुजाणेज्जा ।

जस्सेते वणस्सइसत्थसमारंभा परिण्णाया भवंति, से हु मुणी परिण्णायकम्मे ।

त्ति बेमि ।

छट्ठो उद्देसो

से बेमि — संतिमे तसा पाणा, तं जहा - अंडया पोयया जराउया रसया संसेइया सम्मुच्छिमा उब्भिया उववाइया । एस संसारे त्ति पवुच्चइ । मंदस्स अवियाणओ । णिज्झाइत्ता पडिलेहित्ता पत्तेयं परिणिव्वाणं । सव्वेसि पाणाणं सव्वेसिं भूयाणं सव्वेसिं जीवाणं सव्वेसि सत्ताणं अस्सायं अपरिणिव्वाणं महब्भयं दुक्खं, ति बेमि ।

तसंति पाणा पदिसो दिसासु य । तत्थ तत्थ पुढो पास
आउरा परितावेंति। संति पाणा पुढो सिया ।

लज्जमाण पुढो पास । अणगारा मो त्ति एगे पवयमाणा, जमिणं विरूवरूवेहिं सत्थेहिं तसकाय समारंभेणं तसकायसत्थ समारंभमाणे अण्ण वि अणेगरूवे पाणे विहिंसइ । तत्थ खलु भगवया परिण्णा पवेइया - इमस्स चेव जीवियस्स, परिवंदण-माणण-पूयणाए, जाई-मरण-मोयणाए,
दुक्खपडिघायहेउं, से सयमेव तसकायसत्थ समारंभइ, अण्णेहि वा तसकायसत्थ समारंभावेइ, अण्ण वा तसकायसत्थ समारंभमाणे समणुजाणइ ।

तं से अहियाए, तं से अबोहीए । से तं संबुज्झमाणे आयाणीयं समुट्ठाए । सोच्चा खलु भगवओ अणगाराणं वा अंतिए इहमेगेसिं णायं भवइ - एस खलु गंथे, एस खलु मोहे, एस खलु मारे, एस खलु णरए । इच्चत्थं गढिए लोए, जमिणं विरूवरूवेहिं सत्थेहिं तसकाय समारंभेणं तसकायसत्थ समारंभमाणे अण्ण वि अणेगरूवे पाणे विहिंसइ ।

से बेमि —

  1. अप्पेगे अच्चाए वहंति,
  2. अप्पेगे अजिणाए वहंति,
  3. अप्पेगे मंसाए वहंति,
  4. अप्पेगे सोणियाए वहंति,
  5. अप्पेगे हिययाए वहंति

एवं पित्ताए वसाए पिच्छा पुच्छाए वालाए सिंगाए विसाणाए दंताए
दाढाए णहाए ण्हारुणीए अट्ठिए अट्ठिमिंजाए अट्ठाए अणट्ठाए । अप्पेगे हिंसिंसु मे त्ति वा वहंति, अप्पेगे हिंसंति मे त्ति वा वहंति, अप्पेगे हिंसिस्संति मे त्ति वा वहंति ।

एत्थ सत्थं समारंभमाणस्स इच्चेते आरंभा अपरिण्णाया भवंति । एत्थ सत्थं असमारंभमाणस्स इच्चेते आरंभा परिण्णाया भवंति ।

तं परिण्णाय मेहावी णेव सयं तसकायसत्थं समारंभेज्जा, णेवऽण्णेहिं तसकायसत्थं समारंभावेज्जा, तसकायसत्थं समारंभंते वि अण्णे ण समणुजाणेज्जा ।

जस्सेते तसकायसत्थसमारंभा परिण्णाया भवंति । से हु मुणी परिण्णायकम्मे ।

त्ति बेमि ।

सत्तमो उद्देसो

पहू एजस्स दुगुंछणाए ।

आयंकदंसी अहियं ति णच्चा ।

जे अज्झत्थं जाणइ, से बहिया जाणइ; जे बहिया जाणइ, से अज्झत्थं जाणइ ।

एयं तुलमण्णेसिं। इह संतिगया दविया णावकंखंति जीविउं ।

लज्जमाणा पुढो पास । अणगारा मो त्ति एगे पवयमाणा जमिणं विरूवरूवेहिं सत्थेहिं वाउकम्मसमारंभेणं वाउसत्थं समारंभमाणे अण्णे वि अणेगरूवे पाणे विहिंसइ ।

तत्थ खलु भगवया परिण्णा पवेइया — इमस्स चेव जीवियस्स, परिवंदण-माणण-पूयणाए, जाई-मरण मोयणाए, दुक्खपडिघायहेउं, से सयमेव वाउसत्थं समारंभइ, अण्णेहिं वा वाउसत्थं समारंभावेइ, अण्णे वा वाउसत्थं समारंभंते समणुजाणइ ।

तं से अहियाए, तं से अबोहीए । से तं संबुज्झमाणे आयाणीयं समुट्टाए ।

सोच्चा खलु भगवओ अणगाराणं वा अंतिए इहमेगेसिं णायं भवइ — एस खलु गंथे, एस खलु मोहे, एस खलु मारे, एस खलु णरए ।

इच्चत्थं गढिए लोए । जमिणं विरूवरूवेहिं सत्थेहिं वाउकम्मसमारंभेणं वाउसत्थं समारंभमाणे अण्णे वि अणेगरूवे पाणे विहिंसइ ।

से बेमि — संति संपाइमा पाणा आहच्च संपयंति । फरिसं च खलु पुट्ठा एगे संघायमावज्जंति । जे तत्थ संघायमावज्जंति, ते तत्थ परियावज्जंति ।

जे तत्थ परियावज्जंति, ते तत्थ उद्दायंति ।

एत्थ सत्थं समारंभमाणस्स इच्चेते आरंभा अपरिण्णाया भवंति । एत्थ सत्थं असमारंभमाणस्स इच्चेते आरंभा परिण्णाया भवंति ।

तं परिण्णाय मेहावी णेव सयं वाउसत्थं समारंभेज्जा, णेवऽण्णेहिं वाउसत्थं समारंभावेज्जा, णेवऽण्णे वाउसत्थं समारंभंते समणुजाणेज्जा ।

जस्सेते वाउसत्थसमारंभा परिण्णाया भवंति, से हु मुणी परिण्णायकम्मे ।

त्ति बेमि ।

एत्थं पि जाण उवादीयमाणा, जे आयारे ण रमंति, आरंभमाणा विणयं वयंति, छंदोवणीया
अज्झोवण्णा आरंभसत्ता पकरेंत्ति संगं ।

से वसुमं सव्वसमण्णागयपण्णाणेणं अप्पाणेणं अकरणिज्जं पावं कम्मं तं णो अण्णेसिं ।

तं परिण्णाय मेहावी णेव सयं छज्जीवणिकायसत्थं समारंभेज्जा, णेवऽण्णेहिं छज्जीवणिकायसत्थ॑ समारंभावेज्जा, णेवऽण्णे छज्जीवणिकायसत्थं समारंभंते समणुजाणेज्जा । जस्सेते छज्जीवणिकायसत्थसमारंभा परिण्णाया भवंति, से हु मुणी परिण्णायकम्मे ॥

त्ति बेमि ।

© CA Manas Madrecha

© 2020 - 2021